آرمان مهدویت مذهبی ، اعتقادی
ای گوزلریم طاقت گتیر باخ یوللارا یارون گلیر
ای دل یورولما غصه دن دوز درده دلدارون گلیر
دوندرمه گـوزیاشون سئله
یـار عشقینه طاقت ائله
گتمه گوزوم روءیالره گوز تیک نگارین راهینه
ائیله دعا صبح و مسا بو عرش عشقین ماهینه
هجران آغارتدی باشلاری جاری ائدوب قان یاشلاری
مولا دوشوب یوسف کیمی ایللردی هجران چاهینه
بیر گون بو ماهین فجری وار
دوز منتظر اول اجری وار
دوزسون فراقه آی گوزوم بو ایش سنه تمرین اولار
بی صبر و تاب عاشقلرین سیمالری غمگین اولار
باخ یوللارا یار عطرین آل ائیـله تجسم گوزلره
یورقونلق احساس ایلسون کیپریکلرون سنگین اولار
هجران غمی چوخ سختیدور
کیم تاب ائدوب خوشبختیدور
ای دل چالشما قوش کیمی عاشق مأب اول صبر ائله
پیک ائیلیوب ئوزآهووی قوش گونده یئل لردن یئله
عرض ائیله یابن فاطمـه یول گوزلیـور عاشقلرون
قویما سرای صبـرینی عاشقلـرون وئرسون سئله
گلسون اورکلر شاد اولار
دنیـا یوزی آباد اولار
یابن الحسن کوکو کیمی من روز و شب نالانووم
یول گوزلمک یوردی منی تئز گل داخی قــربانوم
سن سیز عدالت آغلیور انصاف اولوب خانه نشین
وجـدان عـذاب آلتندادی مشتـاق الرحمانووم
قرآنه گل امداد ائله
زندانیدور آزاد ائله
دیللر همالر بـالی تک قئید جفایه بسته دور
بیر گون بیزه امید اولان گور کیملره همدسته دور
سسلر باتوبدور سینه ده مظلومه یوخ امداد ایدن
رحمی سالوبلار رسمیدن روحیه لر دای خسته دور
دیو اگلشوب دیوانیده
مظلوم ایدوب قرانیده
انسانیت ماتم دوتــــوب بو درده وجدان آغلیور
حقی باتان ایتــــام تک انصاف اوزی قان آغلیور
راهین آدیلان بعضی لر یولدان چیخوب چاهه دوشور
بو غفلـته بو ذلتـه حسرتلـه قـرآن آغلیور
سیمای دین باتمش غمه
دین اگلشوبدور ماتمه
شاعر : استاد غلامرضا هادی اردبیلی
