شعر مفاخره ی علی و زهرا (علیهما السلام) به زبان شیرین آذربایجان

شعر مفاخره ی علی و زهرا (ع)

شاعر : استاد کلامی زنجانی

منبع: کتاب آوای کلامی، انتشارات پیری، تاریخ چاپ ۱۳۷۹

۱

عشقیم چکور سوز باشلیام ولادن

خالص ولا ارزشلیدور طلادن

حاشا ولا اهلی قاچا بلادن

بازار عشقه گل ولا ساتولاّر

اهل ولایه کربلا ساتولاّر

۲

عشقیم چکور السون علی معینیم

آرتسون علینون حقینه یقینیم

گر قالسا دائم سجده ده جیینیم

فخر ایلرم یاریله اُلفتیم وار

شکر ایلرم شور ولایتیم وار

۳

ولایت اولماسا دیانت اولماز

دیانت اولماسا شهادت اولماز

شهادت اولماسا شرافت اولماز

عاشیقلرین وقاریدی ولایت

شهیدلرین شعاریدی ولایت

۴

باب علی زاهد پناهگاهیمدی

کیم یاعلی سسلر منیم شاهیمدی

ئوز عشقیمه شاهد ئوز اللّهیمدی

اللّه اکبر گور نه عزّتیم وار

مولا غلامیم شرافتیم وار

۵

گر درگه مولاده خادمم من

منهای عشق مرتضی کیمم من؟

دوتسا الیمدن قلبه حاکمم من

دُوز قاتسا شعریمه قلم گُل ایلر

ردّ ایلیه شاعر تنزّل ایلر

۶

دوزدی علینون مدحه یوخ نیازی

نیلوم ئورک سُئور او سرفرازی

نهی اولمیوب قرآندا عشقبازی

ای مدعی اثبات نقلین اولسون

عاشقلره دولاشما عقلین اولسون

۷

مولا آدین هر کس یازا کفنده

اولماز هراسان محشره گلنده

باخ عزّت و جلاله بوالحسنده

روز قیامت سسلنر فرشته

ضدّ علی نامحرمدی بهشته

۸

نور علی نور خدادی تابان

کفّوی فقط زهرادی خیر نسوان

عالم اولا بو ایکی نوره قربان

هم وزنیدور بو گوهران دلجو

داغدان آغیر هر کفّه ی ترازو

۹

اللّه یاراتدی بو ایکی مرادی

کامل اولا انسانلار اعتقادی

پیغمبرین پاکیزه دور نژادی

اون بیر ولی که جلوه ده جلیدی

محورلری زهرائلین علیدوی

۱۰

محکمدی بو روایت و گزارش

فرزانه عالملر ایدوب نگارش

باخ مجمع النورینه صفحه قرخ بش

گوش خرد بو ذکریلن دولوبدی

عوالم الزّهراده ثبت اولوبدی

۱۱

فخریله بیر گون مرتضای حیدر

فرمایش ایتدی ای بتول اطهر

سندن منی آرتیق سُئور پیمبر

مؤمنلرین تنها امیریم من

سلطان لولاکین وزیریم من

۱۲

زهرا دیدی یابن الحسن عم اوغلی

ای کعبه نین مولودی زمزم اوغلی

وی هر دمون مشتاقی مریم اوغلی

دوزدور که سن داماد مصطفاسن

امّا اونون ایستکلی سی منم من

۱۳

مولا بیوردی ای یگانه یاریم

ای مریمه فخر ایلین نگاریم

ایتسن مُفاخره وار افتخاریم

بیر ایش گوراخ اللّه، راضی السون

شخصاً رسول اللّه، قاضی اولسون

۱۴

یتدی قبوله بو گوزل مقوله

به به جلال حیدر و بتوله

باهم گلوبلر محضر رسوله

شاد اولدی قلبیدن نبیّ اکرم

پیشواز ایدوب بیوردی خیر مقدم

۱۵

شوریله دولدی مجلس تولاّ

تخت قضاوتده اوتوردی طاها

صاقدا علی صولدا دایاندی زهرا

مقابلده حسن حسین مظلوم

بش نوره ناظر زینبیله کلثوم

۱۶

سوز باشلادی اوّلده ماه عصمت

عرض ایتدی ای فرمانروای خلقت

بو من بو حیدر سن ایله قضاوت

واضحدی که بیره عنایتون وار

اما کیمه آرتیق محبّتون وار

۱۷

باخدی بتول و مرتضایه احمد

غنچه کیمی گولدی لب محمّد

فرمایش ایتدی ای سُرور سرمد

سنده منه محبوبسن علیده

سنده منه منسوبسن علیده

۱۸

مولا دیدی من فخر اوصیایم

زهرا دیدی من خیر_هالنّسایم

مولا دیدی گنجینه ی غنایم

زهرا دیدی حورای فرش گردم

طاهایه دخت منحصربفردم

۱۹

مولا دیدی عشقیمدی سینه حکّی

یوخ هیچ کسین بو افتخاره شکّی

شیر حجازم قهرمان مکّی

ایثارمه قرآندا واردی آیه

ویردیم نماز اوسته اوزوک گدایه

۲۰

زهرا دیدی لولاک آتام کسیمدی

مولا دیدی لولا علی بسیمدی

زهرا دیدی گویده منیم سسیمدی

باشیمی لولا فاطمه اوجاتدی

اللّه سیری منه گوره یاراتدی

۲۱

گرم اولدی هر دم مجلس تفاخر

یوخ هیچ بیرینده کینه و تظاهر

به به بولاردی اشرف الاکابر

چشم فلک بو بزمه ناظر اولدی

مین مین ملک مجلسده حاضر اولدی

۲۲

مولا دیدی ابن الصّفا منم من

زهرا دیدی کنز خفا منم من

آرام جان مصطفا منم من

مولا دیدی من حامل لوایم

زهرا دیدی هر درده من دوایم

۲۳

مولا بیوردی قبله الانامم

اوّل مسلمان اوّلین امامم

زهرا دیدی دارای احترامم

من یوز چوورسم قبله ی نیازه

اللّه دیر احسن بیله نمازه

۲۴

مجلسده طاها جلوه ی جلیده

بیر گوز قیزیندا بیر گوزی علیده

یر گوی وَلَه انوار منجلیده

گه فاطمه فاخردی گاهی حیدر

هر کلمیه احسن دیور پیمبر

۲۵

مولا دیدی دُوردانیم یگانه

من کعبه ده قویدوم قدم جهانه

زهرا دیدی آند اولسون انس و جانه

یوخ حق یانیندا من کیمی مؤیّد

آنام خدیجه دور بابام محمّد

۲۶

علی بیوردی خادمیمدی جبریل

زهرا دیدی منلن دانشدی راحیل

علی دیدی حق مندن ایتدی تجلیل

قرآندا بای بسمه الرحیمم

حَبل المتینم بَناء العظیمم

۲۷

زهرا دیدی من جلوه ی نعیمم

مولا دیدی تفسیر حا و میمم

من اِهدناالصّراط مستقیمم

زهرا دیدی من آیه ی حجابم

خلقت هامی ذرّه من آفتابم

۲۸

علی بیوردی حجّت اللّهم من

خانم بیوردی عصمت اللّهم من

علی بیوردی غیرت اللّهم من

جان قیدینی باشیمدن آتمیشام من

پیغمبرین یرینده یاتمیشام من

۲۹

زهرا دیدی آلاّم فرشته دن باج

نور الهی دَن باشیمدا وار تاج

عرشه منیم آتام ایدوبدی معراج

شأنینده وار تکریم قاب قوسین

بنت الرّسولم افتخار کونین

۳۰

مولا دیدی ایتدیم رسوله یاری

الاندا پیغمبر دلنده جاری

وار لافتی الاّ علی شعاری

انصار اُحد داغندا جار ایشتدی

لاسیف الاّ ذوالفقار ایشتدی

۳۱

زهرا دیدی حقّین منم نگاری

ویردی کیمه اللّه بو افتخاری

عقدیم اولوبدی آسماندا جاری

اللّه طویومدا گوگلومی آلوبدی

یری گویی کابینمه سالوبدی

۳۲

مولا بیوردی وُلد مُحصناتم

زهرا بیوردی بنت صالحاتم

مولا بیوردی کشتی نجاتم

زهرا دیدی من نیّر هُدایم

سن کشتی اولسان منده ناخدایم

۳۳

مولا دیدی جمع کسایه جانم

زهرا دیدی من اوردا میزبانم

مولا دیدی مخدوم قدسیانم

زهرا دیدی مین ناز احسنیلن

اللّه سیزی تانتدیروب منیلن

۳۴

ضمن مفاخره بیوردی طاها

ای گوزلریم نوری وفالی زهرا

هاردا علینون مثلی واردی آیا

هر کس سنه عرض ارادت ایلر

همین علی اونا شفاعت ایلر

۳۵

زهرا دیدی هم شأن مرتضایم

منده بابا شفیعه جزایم

مولا دیدی من نفس مصطفایم

نورالعُلا مندن ایدور تجلاّ

عالی آدیم علیدی اللّه اعلا

۳۶

زهرا دیدی وار منده ده مباهات

آرتیردی شأنیم کافی المهمّات

من فاطمه حق فاطرالسّماوات

مولاد دیدی قدسی منادیم من

کلّ موحّدینه هادیم من

۳۷

زهرا دیدی من نور مشرقینم

مولا دیدی من فخر قبلتینم

زهرا دیدی من مادر حسینم

مولا دیدی الگوی مکتبم من

زهرا دیدی استاد زینبم من

۳۸

مولا دیدی عیسایه ویرمیشم دم

زهرا دیدی مندن دم آلدی مریم

مولا دیدی ئوپدی آدیمدان آدم

زهرا دیدی آدم که توبه ایتدی

یا فاطمه دیدی قبوله یتدی

۳۹

مولا دیدی مولای بی نظیرم

شخصیت مراسم غدیرم

زهرا دیدی من صاحب سریرم

ودیعه ی پیمبر امینم

سَیَد_ۃالنّساء عالمینم

۴۰

مولا دیدی یوخ وقریمون شکستی

سندرمیشام اعراب بت پرستی

زهرا دیدی ای افتخار هستی

واردی منیمده عرشیده اَریکم

باش عرشه قُوزاسان سنه شریکم

۴۱

مولا بیوردی مونه سرورم من

شهر علوم احمده درم من

زهرا دیدی قرآندا کوثرم من

مولا دیدی میداندا صفدرم من

حیدر آدیم فتّاح خیبرم من

۴۲

زهرا دیدی شاه ولا سرشته

خاک قدومیمدن ئوپر فرشته

اوّل منم وارد اولان بهشته

مولا دیدی شرط ولایتم من

تنها قسیم نار و جنتّم من

۴۳

سالار انبیا رسول خاتم

یوز دوتدی زهرایه بیوردی اول دم

ای سرور کلّ زنان عالم

باهمدی آیرلماز اوزوک قاشندان

دور ئوپ قیزیم عم اوغلووین باشندان

۴۴

سانما علی تکدی گلوب به تفصیل

جبرائیل و میکائیل و روائیل

اسرافیل و عزئیلیه راحیل

حاضردی سکّزمین ملک بو یرده

ایلوللر حیدره کمک بو یرده

۴۵

زهرا خانم بقیه النبوّت

امر رسوله ایلدی اجابت

فرق امامتدن ئوپدی او ساعت

تا ئوپدی فاطمه سر علینی

علیده ئوپدی فاطمه الینی

۴۶

بو بوسه لرده واردی چوخ معما

تحلیل ایدر معنانی اهل معنا

ئوپدی نیه فرق علینی زهرا؟

یعنی بو باش نامحرمه خم اولماز

باش سینیادا شخصیّتی کم اولماز

۴۷

اما اوخی تفصیلی مُجملندن

ئوپدی نیه علی بتول الندن

گویا علی بلورمیش اوّلندن

زهرانین اللری گره گشادی

مشگل گشایه یار باوفادی

۴۸

گویا بلورمش کونه اود ورالاّر

اوچ یوز نفر قاپونی یاندرالاّر

همان الی قمچی له سندرالاّر

یاندی قاپی یاندی دلی علینون

اینان دیسم سیندی بئلی علینون

۴۹

دوران دولاندی موسم غم اولدی

امنیّتین بساطی برهم اولدی

معناده قد مصطفی خم اولدی

گل تک حصار خاره دوشدی زهرا

بین در دیواره دوشدی زهرا

۵۰

فضّه دیور گوردوم خانم یخلدی

سیندی قاپی توستی ایوه داغلدی

گویده ملک وحشت نمازی قیلدی

سسلندی فضه دوت منیم الیمدن

سوموکلریم سیندی یاپش بئلیمدن

۵۱

گل فضه جان قلبون بو حاله یانسون

مرهم گتور سینم قانی دایانسون

اورت باشیمی قویما علی اوتانسون

کناره چک دورت نازلی نور عینی

تهاجمدی ایاقلالاّر حسینی

۵۲

بلایه عهدیمدی بلی دیم من

بو ذکری با صوت جلی دیم من

سن گل اوتاندیم یا علی دیم من

بابام دیوب اوز ورما مرتضایه

سحر بابام مندن ایدر گلایه

۵۳

علی منیم امام و سروریمدی

من پیشمرگیَم او رهبریمدی

بو آستانه قانلی سنگریمدی

ولایت اوسته ئولّم، عزّتیمدی

علی منیم شاه ولایتیمدی

۵۴

آند اولسون آسمان بی عموده

قاپی دالندا خُرد اولان وجوده

یارالی سینه صورت کبوده

آلاّم جانا آلام بی شماری

من قویمارام سینسون علی وقاری