آرمان مهدویت مذهبی ، اعتقادی
بسمه تعالی
ترجمه آذری محاوره ای متن خطبه فد کیه ی حضرت صدیقه کبرا ، فاطمه ی زهرا (سلام الله علیها)
دونده ره نی : محمد صادقی مهریار
آللهین ستایشی
ستایش، الهی کمال لارصاحبی اولان ذات اوچون دی ،او نعمت لره گوره کی عطا ائدیب .
بوللی سپاس و شکرلرهر زادا کی الهام بویوروب ، بوللی سلاملاروئردیقی مرحمت لره ،عمومی نعمت لرین باشلانیشی ، و نعمت لرین یئتئرلی و وسعت لی اولوب ارزشلی عطیه لرین دال بادال و تمام اولماغینا کی تعدادی او قدر چوخ دی کی سایا گلمز و نعمتلر او قدر قورتولماز دی کی پاداش مقامیندا یئرلشمئز.بو نعمت لرین ابدیتی او اندازه متعالی دی کی درک اولونماز .
نعمتلرین آرتماغینا ، شکره دعوت ائدیب و نعمتلری کامل ائدیب گونده رماغینان ستایشه فرمان بویوروب .و آخرت ده جماعتی بئله بیر نعمت لرین مثلینه دعوت ائدیب .
توحید و صفات الهی
شهادت وئریرم ،تک آللهدان سوای معبود یوخدی .بو شهادت کلمه سی ، بیر کلمه دی کی اخلاص ،اونون تاویلی دی .اونون “توحید درکی “، اوره کلرده قویولوب دی.فکر و اندیشه ، الهی آیاتین عظمتینه منور اولوب او متعال آلله کی گوزلرین گورماغیندان متعالی و یوخاری دی ودیل لرین توصیفینه گلمز .فکر و تصورلرین درک یندن او قدر یوخاری دی کی اونون ذاتی نین کیفیت نه ،ال تاپماق اولماز.یارانمیشلارین هامیسین ، قاباقکی ماده لری اولمامیش یاراتدی و هئش بیر نقشه و صورت ده ن پیروی ائتمیب اولاری وجودا گئتیردی .ئوز قدرت و مشیتی نن وجود بغیشله دی ، بیر حالدا کی اولارین وجودا گئتیرماقینا و بو باره ده منفعت کسب ائتماغینا ،هئش احتیاجی یوخودی .مگر بو کی ایسته دی ئوز حکمتین تثبیت ائده و جماعتی ئوز اطاعتینه فرمان وئره .قدرتین آشکار ائده و بنده لری عبودیته چاغیرا ، و ئوز دعوتی نین تکریمینه ، ثوابی ، طاعته ، و عقاب و کیفری گناها قرار وئردی تا بنده لری ، ئوز خشم و غضبیندن ساخلیه واولاری بهشت وعده سینه یاخین لادا.
نبوت :
شهادت وئریره م،آتام ،محمد (صل الله علیه و آله )آللهین بنده سی و اونون پیامبری دی .اونی، پیامبرلیقا گونده رمه میش اختیار ائدیب انتخاب ائیله دی .اونی خلقت ده ن قاباق ، پیامبرلر و امت لرینه معرفی ائتدی .اونی ، بعثتین نن قاباق انتخاب ائتدی . عالم خلقتیندن قاباق ، اوندا کی هله مخلوقاتین هامیسی غیب پرده سینده گیزلین، و، وحشتناک حادثه لر حجاب دا و عدم ده ایدیلر.عالم ین تاپیلماغیندان قاباق اولونان بو انتخاب ، ذات اقدسین ، ایشلرین قورتولوشونا اولان علمی ، روزگارین حادثه لرینه اولان احاطه سی و ئوز مقدراتی نین زمان و مکانینا ،آشنا اولماغینا گوره ایدی . متعال پروردگار اونی پیامبرلرین هامیسندان سورا مبعوث ائتدی تا پیامبرلیق ایشین اوندان باشا آپارا ،و لاپ آخیر بعثت ده اوندان، ئوز فرمانین اجرا ائده .
او مبعوث اولاندان سورا ، متوجه اولدی هامیلاردا ،تک آللها نسبت فطری معرفت اولا اولا ، امت لر ، دین ده داغیناق دیلار .هله ده آتشکده لرده ،اعتکافا اوتوروب و بتکده لرده بت لار پرستش اولور .بو حالده ایدی کی متعال آلله ظلمت ین قره پرده لرین ئوز پیامبری وسیله سی نن ائشیقلاندیردی و اوره کلرده ن ، ابهامی ، و گوزلرده ن ، حیرت کولگه سین سیلدی .او، دنیا اهلین هدایت ائتدی و اولاری گمراه لیق و گورمه مئزلیقدان نجات بغیشله دی.
اولاری ،محکم و قالارقی دین طرفینه هدایت ائدیب مستقیم یولا دعوت ائیله دی .او وقت کی (رسالتین یئرینه گئتیردی ) آلله اونی ، لطف ، مهربانلیق ، میل و رغبت و ئوز انتخابی نان و دنیانی ایثار ائتماغینان ، ئوز طرفینه آپاردی ، و بئله لیقی نان ایندی ، محمد (ص) دنیا رنج و زحمتیندن فارغ اولوب و مکرم فرشته لری نن غفار پروردگارین رضوانی ، اونی احاطه ائدیب دی .آللهین ، درود و رحمت و برکتلری آتام ، اونون پیامبری ،امینی و سئچیلمیشینه نثار اولسون .
قرآن و احکام فلسفه سی :
حضرت ، سورا حاضرلره اوز قویوب ، بویوردی: سیزای آللهین بنده لری ، الهی امر و نهیه خطاب اولونورسوز .سیز دین و الهی وحی این ،حمل ائده نلری ، الهی احکامین اجراسیندا پروردگارین امینی ، و اولاری امتلره ،ابلاغ ائده نلرسیز .سیزین یانیزدا آللهین حقین ساخلیان ، و سیزه تاپیشیریلان عهد و پیمان وسیزین آرازدا اولان جانشین ، آللهین ناطق و صادق قرآنی دی کی اوجا، نوری و آیدین لادان ائشیقلیقی ، واضح دلیل لر و آشکار لطائفی و آیدین ظواهری وار .قرآن پیرولاری نین درجه و مقاملاری نی ، آییری لار آرزی لیرلار ، قرآن نان تبعیت ائتماق ، بهشته چاتدّیرار، و قرآن نداسینا قولاغ وئرماق ، نجات وسیله سی دی .
الهی پارلاق دلیل لر ، آللهین واجباتی واجتناب ائتمه لی محرماتی ،آللهین ، آیدین آشکار قدرت و عظمت نشانه لری ، انسانی فضیلت لر، اجازه وئریلمیش موردلر و واجب اولان قانونلارا ، قرآن وسیله سی نن چاتماق اولار.
بئله لیقی نان متعال آلله ایمانی ،سیزین شرک ده ن پاک اولماغیز، نمازی ،کبر و نخوت ده ن اوزاق لاشماق ، زکاتی ، نفسین پاک لیقی و روزونون بوللو لوقی، اوروجی ، اخلاص ین محکم لیقی و حجّی دینین اقامه سی اوچون وسیله قرار وئردی .عدالتی اوره کلرین زینت و بیرلیقی ، و بیزده ن اطاعت ائتماغی ملت ده نظم یارانماق و بیزیم امامتی میزی ، تفرقه ده ن اوزاق قالماق و جهادی، اسلامین باش اوجالیقی ، چتین لیقلار برابرینده صبر و مقاومتی ،آللهین اجرینه چاتماق ، امر به معروفی جماعتین مصلحتی ، و آتا آنیه یاخچی لیق ائتماغی ، آللهین خشم و غضبیندن امان دا قالماق ،صله ی ارحامی ، رشد ، خیر و برکت عاملی ، قصاصی قانلارین حفظ اولونماقی ، نذره وفا ائتماغی ، آللهین مغفرت و بخششینه یئتیشماق ، داش ترازونی دوز چکماغی اعتماد عاملی و اموالین نقص و زیاندان محفوظ قالماق وسیله سی ائتدی.شراب ایشماغین نهی این ، چرکین لیقلاردان اوزاق قالماق ، و ناموسی تهمت لرده ن اوزاق گئزماقی ، لعن و نفرین نن اماندا قالماق ، اوغورلوق و سرقت ده ن اجتناب ائتماغی عمومی عفت و امنیت وسیله سی مقرر بویوردی .شرکی حرام ائتدی تا عبودیتی خالص اولا .
پس ای جماعت : آللهدان او جورکی گره ک دی قورخون و اگر بو جور ائتدیز دنیا دان گئدمه سیز مگر باش اوجا و واقعی اسلامی نان . هر زاد دان کی امر و نهی اولموسوز اطاعت ائدین .نیه کی آلله بنده لریندن، فقط عالم لر دیلر کی آللهین مقدس مقامیندان خشیت لری وار .
ای جماعت بیلین کی من ، فاطمه یئم .
سورا مسجد ده حاضر اولانلارا خطاب ائدیب بویوردی : ای جماعت بیلین کی شک سیز من فاطمه یئم و آتام محمد ( صلوات الله علیه ) دی .بو منیم سیزی نن اولان اول آخیر دانیشیقیم دی .هر نه کی دییره م ، نه دوز یولدان خطا ائتمیشم و نه عمدا” اوندان منحرف اولموشام.شک سیز ، ئوز ایچیزده ن سیزه بیر پیامبر گلدی .هر نه ده ن کی سیز اینجیردیز ، اونا چوخ آغیری دی .سیزین سعادتیزه حریص ، و سیزه نسبت چوخ مهربان و عفو و بخشش صاحبی ایدی .اگر بو پیامبری تانیساز ، گوره رسیز کی او ، منیم آتام دی ، نه سیزلرین آروادلاریزین آتاسی .عمو اوغلومون قرده شی دی ، نه سیزین کیشی لریزین قرده شی . نه گوزل نسبت . آللهین سلام و درودی اونا و بالالارینا .او ، ئوز رسالتین ابلاغ ائتدی بیر حالدا کی مشرکلرین صف لرین پوزوب و اولارین یول لاریندان کامل اوزاقی ایدی .مدام مشرکلری تاپدیردی و نفس چکماغی اولاردان آلیردی .حکمت و گوزل نصیحت لری نن اولاری پروردگاری نین یولونا دعوت ائدیردی ، بت لاری سیندیریب ، مشرکلرین باشلارین یئره تیکیردی .آنجاق ، دشمنین ییغیلمیش لشکری شکست ییب دالی اوتوردی .و اسلام گونش شرک ین قارانلیق افقیندان باش قوزادی .حقین پارلاق چهره سی جلوه لندی ، دین رهبری سوزه باشلادی ، شیطان لار سسی خاموش ، نفاق گروهکی ، هلاک ، کفر و نفاق داغیلیب و سیز جماعت اخلاص کلمه سی ( لا اله الا الله ) ای بیر گروه اوزی آغ مجاهدلری نن بیرلیقدا ، دیلیزه گئتیردیز.سیز پیامبرین رسالتیندن قاباق ، وحشتناک بیر اودون یاخین لیقیندا نابودلوق حالینده ایدیز ، حقیرلیقدا ، آغیز دا دولانان ، سو و هضم و اوتماغی راحات اولان بیر تیکه ایدیز.بیراود پارچاسی کی ، تئله سن بیری ، اونی اوغورلیب و زور دین لر ایاقلاری آلتیندا اونی له ائده ر لر .
ایلنمیش سودان ایچیب ، قوروموش مردار اتی یییردیز ، ذلت ده ایدیز ، بشری جامعه ده ن قوغولموش ، اطرافیز دا اولان ابر قدرتلرده ن قورخی دا ، کی اولمیه، وار یوخی زی اوغورلیه لر . سیز بو حالد ه ایدیزکی ، متعال پروردگار ، سیزی بئله بیر فلاکتلی و چتین شرایط ده ن محمد (ص) ین وسیله سی نن نجات بغیشله دی . آمما ، بو نجات ، بویوک و خیردا حادثه لر ده ن سورا ، عرب ین قوردلاری و شجاع کیشی لرو اهل کتاب طغیانچی لاری نان مبارزه ده ن سوره ایدی .هر زمان بیر جنگ اودی الولانیردی ، یا شیطانین بورنوزلارین نان بیری گورسئنیردی ، و یا مشرکلرین آغیزلاری سیزلری اوتماغا آچیلیر دی ، آتام ، ئوز قارداشی ، (مولا ، صلوات الله علیهی ) او وحشتناک حادثه لرین آغیزینا گونده ریردی . او دا ، تمام کیشی لیقی نان او فتنه چی لرین بورونلارین یئره سوتمیین جان و ئوز شمشیری نن فتنه اودون سوندورمیین جان قییدمیردی . او آلله یولوندا ، درد و رنج لری قبول ائده ن ، اونون فرمانین اجرا ائتماخدا چالیشان ، یاخین ارتباطی نان ، همیشه آلله رسولونون کناریندا ،الهی ، اولیا ء،سرورلرین نن ، همیشه جهادا آماده ، و اسلام یولوندا ، خالص ، زحمت چکن و چالیشانی دی .آمما سیز کامل آسایش خاطری نن بیزیم هلاک اولماقی میزین انتظاریندا و اسلام مجاهدلری نین شکست خبرین آختارماق ده ایدیز .و اوز به اوز جنگ لرده ، دالی اوتوروب جنگ ده ن قاچاردیز .
انقلابدان سورا کی رکود دورانی نین بیانی :
اوندا کی آلله ، پیامبرینه ، انبیا نین منزلگاهین و ئوز اصفیاسی نین پناهگاهی ( آخرتی ) انتخاب ائتدی ، ” اوره کلره ایشلین نفاق تیکانی” آشکار اولدی، دین پالتاری چورودی ،دیل لرین کئسن گمراهلار دیل آشدیلار، تانینماز اسگیک لر قدر و منزلت تاپدیلار، باطل ایستیئن لر سسه گلیب سیزین دوره بریز ده” وِئرنیقماغا ” باشلادیلار.شیطان گیزلئندیقی یئرده ن باش قوزادی ، سیزی ئوزونه طرف چاغیردی و سیزی ئوز دعوتینه حاضر و ئوز آللاتماغینا آماده گوردی .سورا سیزی تحریم ائدیب ، سیزی چوخ آماده و قیوراق گوردی ، هیجانا گئتیرب گوردی کی اونون یولوندا نئجه عصبانی سیز .نتیجه ده، ئوز مرکب یز ده ن سوای آییری بیر مرکب نشانه ائتدیز و چشمه ده بیر سو گورمه دی کی سیزین اوندان نصیبیز اولمییه . بو تئله سیک چالیشمالار هله پیامبرین رحلت ین نن ائله بیر زمان گئش مه میش ورسول اکرم (ص) ین فراقیندا بیزیم اوره ک یارالاریمیز التیام تاپمامیش ، و پاک پیکری توپراقا تاپیشیریلمامیش انجام تاپدی .بو تئله سیک ایشلرده ن هدف ، خلافته ال تاپماغی دی که فتنه یه دوشمیه سیز ، آمما فتنه ده غرق اولدوز و جهنم ، کافرلری احاطه ائده ن دی .
نه اوزاق لاشدیز !! سیزه نه اولدی ؟ نیه ئوز یولوزدان چیخدیز ؟ بیر حالدا کی آلله کتابی سیزین برابریز ده دی .دستورلاری آشکار ، احکامی واضح ، نشانه لری بئل لی ، و امر و نهی لری آیدین دی .سیز اونی دالیه آتدیز.آیا اونا هئچ علاقه ز یوخد ی؟ یا قرآن نان سوای آییری بیر زاد یئرینه قویموسوز؟ نه پیس بیر انتخاب . هر کس اسلام نان سوای آییری دین انتخاب ائده ، اوندان قبول اولونماز و او آخرت ده زیانکارلاردان دی . اوندان سورا کی بو خلافت مرکبیننده مستقر اولوب مرکب ین جلووی ، اللریزده آسان اولدی ، فتنه لره دامن ووروب ، اودلار یاندیردیز، جان و دلی نن شیطانین گمراه ائده ن ندالارینا جواب وئریب و دین ین آیدین نورلارین خاموش ائتماقآ و پیامبرین پاک سنت لری نین آرادان آپارماغینا باش قوشدوز .یاواش یاواش ، و پرده دالیندا ، دین آثارین محو ائدیرسیز و فرصت آختاریرسیز تا پیامبرده ن سینه لریزده اولان نفرت و کینه نی ، اونون اهل بیتینه نسبت عملی ائده سیز .بونی بیلین کی ، پیچاق و نیزه اینن بدنی ، پارچا پارچا اولان شخص کیمی ، سیزین برابریزده استقامت و صبر الیروق .
خلیفه نین حضرت فاطمه زهرا (س) توسطی نن محاکمه اولماغی :
ایندی سیز بئله تصور ائدیرسیز کی بیزیم اوچون بیر ارث یوخدی ؟ آیا جاهلیت حکمی نین دالیسجان سیز ؟ کیمین حکمی آللهدان یاخچی دی (البته ) اولارا کی یقین و اینام اهلی دیلر؟ آیا بیلمیسیز (کی من سیزین پیامبریزین قیزی ام)؟بلی پارلاق گون کیمی سیزه آیدین دی کی من اونون قیزی ام.ای مسلمانلار: آیا روا دی من ئوز آتامین میراثنیدا مغلوب اولام ؟ای ابو قحافه نین اوغلی : آیا آللهین کتابیندا دی کی سن آتان نان ارث آپاراسان و من آتام نان ارث آپارمیئم؟عجب، بویوک بیر بهتان دی .آیا عمدا” آلله کتابین ترک قیلیب دالیه آتمیسیزکی دییر : سلیمان داود دان ارث آپاردی ؟ و او حکایت ده کی یحیی بن زکریادان نقل بویوروب کی دئدی: پروردگارا ، ئوز طرفیندن منه بیر اوشاق بغیشله کی من نن و آل یعقوب دان ارث آپارسین ؟و بویوردی : آلله کتابیندا ، ارث ده ارحام ، بیربیرلریندن اولی دیلار و بویوردی: آلله سیزه اولادیز موردینده سفارش الیر کی اوغلانلارین سهمی قیزلارین سهمی نین ایکی برابری دی .و بویوردی : اگر بیری ئوزون نن سورا مال قویدی ، آتا و آنا ، و ارحامینا شایسته صورتده وصیت ائتسین ، بو متقی لره حق دی و سیز بئله تصور ائدیرسیز کی منه آتامین ارثیندن هئش بیر بهره اولا بیلمز؟آیا آلله سیزه بیر آیه نازل ائدیب و اوندا آتامی خارج ائدیب ؟ یا دییرسیز : من و آتام ایکی آییری مذهبین پیروویوق و ایکی مذهب ین پیرولاری ارث آپارمازلار؟آیا من و آتام بیر دین ین اهلی دئیروق؟ آیا سیز قرآنین خاص و عامینا ، آتام نان و عمو اوغلوم نان آرتیخ آگاه سیز ؟ پس آل منیم ارثیمی ( و یا خلافتی ) کی آماده و مهر اولموش بیر مرکب کیمی ، بهره بردارلیقا آماده دی .آمما بیل کی ، حشر گونونده ،سن نن، اوز به اوز اولاجاق . محمد (ص) ین سرپرست لیقی نان اولان و شایسته بیر دادگاهدا ، قیامت زمانی ، کی قاضی سی آلله دی و او گونده دی کی باطل ایستیئن لرزیان دا اولاجاقلار و هر خبره بیر قرارگاه وار و ئتزلیق جان بیلئرسیز کی کیم خوار ائده ن و همیشه لیق بیر عذابا گرفتار اولاجاق .
صدیقه طاهره (س) و اولار کی اونا کمک ائتمه دیلر (انصار)
سورا انصار طرفینه توجه ائدیب بویوردی: ای بویوک کیشیلر، و ای ملتین قول لاری و اسلامین نگهبانلاری ، منیم حقیمده ، بو قیسالیق ائتماقلاریز نه ده ن دی ؟ منه اولان ظلم و ستم برابرینده بئله یوخولو اولدوقوزون علتی نه دی ؟ آیا رسول الله (ص) آتام دئمیردی: کیشی نین احترامین اوشاقلاریندا ساخلیین ؟ نه تئز حادثه یاراتدیز؟ و نه تئله سیک بیراهه گئتدیز؟ بوندان بئله کی منیم مقصده چاتماقیمدا سیزین قدرتیز وارو منیم هدفه یئتیشماقیمدا، سیزده ،لازم اولان نیرو وار یا دییرسیز: محمد (ص) ای ئولوم بورودی (هر زاد باشا چاتدی و نبوت خاندانی قورتولدی؟)بلی ، اونون ئولومی بویوک بیر حادثه ایدی کی اثری هر یئری توتدی ، بوش یئری آشکار اولدی ، پیچیده لیقی همه گیر اولدی ، غیبتی نن یئر اوزی قارانلیق لاشدی ، مصیبتینده اولدوزلار توتولدولار، آرزی لار باشا چاتدی ، داغلار یئندیلر، حریملر سیندیلار و حرمتلر اونون ئولوم زمانیندا بیربیرلرینه دئیدیلر.آند اولسون آللها کی، اونون فقدانی ، بویوک فاجعه و چوخ عظیم مصیبت دی کی اونا تای چتین مصیبت و بدبخت لیق گلمییب .بو ، عز ّ و جلّ آللهین کتابی دی کی ائولریزده دی کی سحر آخشام ، آلچاق و اوجا ، عادی و یا سئومه لی لحنی نن اوخورسوز کی دییر : پیامبرده ن قاباقدا، کئچمیش پیامبرلره ئولوم حادثه سی حتمی و قطعی اولدی ، دئیر محمد (ص) مگر بو کی پیامبر دی و اوندان قاباق دا پیامبرلر گلدیلر.(و گئتدیلر) پس اگر او ئوله و یا ئولدوروله ، سیز ئوز جاهلیت سابقه زه قییده جاقسیز؟ سیز مطمئن اولون کی اگر هر کس قییده آللها ضرر یئتیرمز و آلله شاکرلره پاداش وئره جاق .هان ای قیله اولادی (انصارین لاب یوخاری جده و آناسی ) : آیا سیزین حضوروز دا ،منی آتا ارثیندن محروم ائده لر ؟ و بیر مجلس ده و جمع ده کی من سیزی چاغیریرام ، گوروسوز و ائشیدیرسیز و منه روا گورولن ظلمه آگاه سیز .سیزین چوخلی نفرلریز وار و (من نن دفاع ائتماخدا) قدرت و امکاناتیز وار .منیم سسیمه ، سس وئرمیسیز و منیم فریادیما چاتمیسیز.سیز همان صالح لر و سئچیلمیشلری دیز کی عربی نن جنگ ائتماغا انتخاب اولدوز و بو یولدا زحمت لره متحمل اولدوز و امت لری نن اوز به اوز اولوب شجاعتلی لر برابرینده دایاندیز و همیشه سیزه دستور وئره ردیق و سیز اجرا ائده ردیز .اوراجان کی اسلام دئرمانی ایشه دوشدی ، روزگارین خیر و برکتی جاری اولدی ، شرک نعره سی باتدی ، یالان قئینئماقدان دوشدی، کفر اودی خاموش اولوب، تفرقه سسی باتدی و دین نظامی ترتیبه دوشدی. بو اعلان لار و بیان لاردان سورا ، نیه بئله حیران قالیب ، گیزلین ایشلر گورورسوز ؟ نیه باشلانیشدان سورا دالی اوتدوز؟ نیه ایماندان سورا شرکه قییتدیز؟ نیه پیمانلارین سیندیرانلار و رسول آلله (ص) ای ، ائشیه اوتورماق قصدی اولانلار و اول گونلرده جنگی باشلیانلاری نان جنگ ائتمیسیز ؟ آیا اولاردان قورخوسوز ؟ شایسته دی آللهدان قورخاسیز، اگر ایمانیز اولسا ، هشیار اولساز .
گوروروق خوشگذرانلیق و راحت طلب لیقا اوز گئتیرمیسز ؟ ایشلری رتق و فتق ائتماغا شایسته اولانی کنارا وورموسوز و بیر گوشه ده ،تن پرورلیقا باخیسیز .فشارلار و چتین لیقلاردان احساس سیزلیق فضاسینا اوز گئتیرمیسیز، ایمان نان آلدیقلاریزی ائشیه توکدوز و گوارالیقی نان اوتدوقلاریزی قئیتئردیز .بیلین ،اگر سیز و یئراوزونده کی لرین هامیسی کافر اولالار (آللهین ملک و قدرتیندن هئش زاد آزالماز ) نیه کی آلله غنی و سپاس ائده ندی .منیم دئدیقلاریم (” سیزین حالیزا نا آگاه اولدوقا گوره” دئیردی ) بلکه آگاهلیقی نان دئدیم . سیزین وجودوز دا اولان کمک ائتمه ماق روحیه سی ، و اوره کلریزده اولان حیله و نیرنگ لر سبب اولدی اوره ک ده کی غصه لر داشسین و عصبانیت لر ائیشیه توکولسون ..نتیجه ده سیزین چتین لیقلار برابرینده استقامت ائتماق قدرتیز آزالدی و اوره کلریزده اولانلاری ظاهر ائتدیز .دئدیقلاریم اتمام حجتی دی –ایندی بو خلافت مرکب ین آلین و هر نه کی وزر وبال وار اونا چاتین ، امما بو مرکبین بئلی، یارا ، ایاقی مجروح و ننگی همیشه لیق دی .اونون نشانه سی ، آللهین غضبی دی کی شعله سی ، سینه لرده ن ائشیه وورار ، گوردوقوز ایشلرین هامیسینا آلله شاهد دی و نه تئز اولار کی ظالملر دوشونه لر کی نئجه چتین بیر قییدیش ده قرار تاپاجاقلار .من ، روبروز دا اولان شدتلی عذاب دان سیزلری قورخودانین قیزی ام .شایسته بو دی کی بیز و سیز ، ئوز وظیفه میزی انجام وئرماخدا قیسالیق ائتمیاق .و ئوز عمل لریمیزین نتیجه سی نین انتظاریندا اولاق .
خلیفه نین جوابی :
سورا ابوبکر ، عبدالله بن عثمان ، فاطمه (س) نین جوابین بئله وئردی : ای رسول اللهین قیزی ، حقیقتا” ، سیزین گرامی آتاز، مومنلره رئوف ، مهربان و کریمی ایدی و کافرلره بویوک شکنجه و دردلی عذاب .اگر خانواده نسبتی نین دالیسیجان اولاق ، او بزرگوار سیزین آتاز و نه او بیری آروادلارین آتاسی ایدی ، و سیزین همسریزین قرده شی و نه اوبیری یولداشلارین قرده شی ایدی.گوروروق کی نبی اکرم (ص) (سیزین همسریزی) هر بیر آییری دوستا ترجیح وئردی .و سیزین همسریز هر بیر بویوک ایشده پیامبره کمک اولدی .سیزی سئومز مگر خوشبخت ، و دشمن سایماز مگر بد بخت .پس سیز رسول الله ین پاک خاندانی سیز و نجیب لرین سئچیلمیشلری .هر بیر خیره راهنما سیز و بهشت یولونون علامت لری.سیز ای خیره النساء ، خیره الانبیانین قیزی سیز.دانیشیقدا صادق ،عقل و دوشونجه ده او بیریلره سبقت آلان سیز .هئش وقت سیزین حقیز ده قیسالیق ،و انتخاب ائتدیقیز دوز یولدا، مانع اولمییه جاق .آند اولسون آللها ، من رسول اللهین نظریندن تجاوز ائتمیرم و هئش وقت اونون اجازه سی اولماسا بیر ایش گورمیه جاغام.نیه کی قاباقدا گئده ن و قافله سالار ، قافله اهلینه یالان دئمز .آللهی بو مسئله ده شاهد توتورام ،اونون شهادتی کفایت ائده رکی آللهین رسولوندان ائشیتدیم کی بویوردی :
: بیز انبیاء طایفه سی قیزیل ، گوموش ،ائو و زمی ارثه قویماریق .بیزده ن ارث قالان کتاب ، حکمت ، دانش و نبوت دی .بیزده ن قالانلارین اختیاری بیزده ن سورا کی ولی امرین الینده دی کی صلاح گوردوقون اونا گوره حکم ائده ..سیزین فدک موردینده اولان ایسته دیقیز ، بیز اونی اسلام رزمنده لرینه آت و اسلحه تهیه ائتماغا قرار وئرمیشیق کی اوندان کافرلر و تبهکارلاری نان جنگ ائده .بو بیر زاد دئیر کی من تک لیقدا اونا گوره تصمیم توتموش اولام بلکه تمام مسلمانلارین اجماع سینان انجام وئرمیشئم .بودی منیم حالیم .منیم اختیاریمدا اولانلار سیزین کی و سیزین اختیاریزدا دی . سیزده ن مضایقه ائتمیره م .سیز گرامی آتازین امتی نین خانم لاری نین سروری سیز و اوشاقلاریزین ریشه سی نین پاک آغاجی سیز و هئش وقت سیزین فضیلت و برترلیقیز انکار اولونمالی دئیر .و سیزین حقوقوز دا ( ایستئر اصل ده و یا فرع ده ) قیسالیق اولمییه جاق .سیزین دستوروز منیم شخصی اموالیم دا نافذ دی .آیا بئله لیقی نان صلاح گوروسوز بو مورد ده من گرامی آتازین فرمانی نان مخالفت لیق ائده م ؟
حضرت صدیقه طاهره نین جوابی :
صدیقه طاهره بویوردی : سبحان الله ، هئش وقت آللهین رسولی آلله کتابیندان اوز چونده رمئزدی و اونون احکامینان مخالفت لیق ائتمزدی .بلکه همیشه قرآنین پیروی ایدی و سوره لری، بویورانلاردان تبعیت ائده ردی .آیا ایندی مکر و حیله تصمیمیز وار و اونا یالان نسبتی وئرماغینان عذر گئتیریرسیز؟ سیزین بوحیلئز او توطئه لره اوخشور کی پیامبرین حیات زمانی ، اونی آرادان آپارماق اوچون انجام تاپاردی .ایندی بو آللهین کتابی دی کی حق ین قاضی سی و حق دانیشان دی .بئله بویورور: ( و او اوشاق ) کی من نن و یعقوبون اولادیندان ارث آپارار .همیده دییر : و سلیمان داود دان ارث آپاردی .بویوک و قادر آلله ، ارثی تقسیم ائتماخدا ورثه نین هر بیری نین سهمین ایستئر کیشی ویا آرواد مشخص بویوروب : او جوره کی باطل آختارانلار و بهانه آختارانلارا ، و گله جاقکی لارا ، شبهه و گمان یئری قویمییب .بئله دئیر کی سیز عمل ائدیرسیز بلکه بو نفسانی هوا و هوسلر و شیطانین جلوه لری دی .بو زمان جمیل صبر ده ن سورا ، آییری یول یوخ ، و آللهدان دئدیقلاریز و (عمل ائتدیقلاریز) برابرینده کمک ایستیره م .
ابوبکر جواب دا دئدی: آلله و رسولی دوغری بویوروبلار .سیز ده ای پیامبر قیزی ، دوغری دئدین. سیز حکمت معدنی و هدایت و رحمت مرکزی ، دین ین ستونی و حجت ین سرچشمه سی سیز .سیزین بویوردوقوزون دوزلوقون، اوزاق گورموره م و سیزین خطابه زی انکار ائتمیره م ، آمما بو مسلمانلار سیزی نن منیم آرامدا داوردیلر .اولار خلافتی منیم بوینوما سالدیلار.آلدیقلاریم اولارینان بیرلیقدا و اولارین تصمیم لری ننی ایدی .هر بیر زور، استبداد و خود پرستی ده ن اوزاق .و اولار بونا شاهد دیلر .
فاطمه سلام علیها و جماعت :
سورا صدیقه طاهره (س) جماعته متوجه اولوب بویوردی: ای جماعت ، ای باطل و بیهوده سوزلره شتاب ائده ن لر ، و چرکین ایشلری نن ضررلی ایشلره ،گوز اورتئن لر ، آیا قرآن دا تدبر و تفکر ائتمیسیز؟ یا سیزین اوره کلریزه مهر ورولوب ؟ بئله دئیر ، بلکه سیزین پیس اعمالیزا گوره قلب لریزه مهر وورولوب و نتیجه ده قولاقلاریزدان ائشیتماق و گوزلریزده ن گورماق آلینیب دی ، الهی آیه لری ، نه پیس تاویل ائتدیز و ئوزوزده ن نه پیس بیر رای نشان وئردیز.اوضاع نی نه پیس دگیشدیز، شک سیز آغیر یوکون آغیرلیقینا ، و چوخ پیس عاقبته گرفتار اولاجاق سیز .اوندا کی پرده گوزلریز قاباقیندان کنارا وورولا و پرده دالیندا اولان زیانلار سیزه آشکار اولا ، یئتیشمیئن درد و شکنجه آشکار اولار ، اوردا دی کی باطل ایستیئن لر زیان گوره رلر.
سورا او حضرت ، پیامبر (ص) ین قبرینه اوز چوند ه ریب بویوردی : سن نن سورا مختلف خبرلر و سوزلر اوز وئردی ، اگر سن اولسی ایدین اولار اوز وئرمزدی ، حقیقتا” بیز بیر یئره اوخشوروق کی یاغیشلارین الده ن وئریب و سنین قومون پریشان و مختل اولوبدی .باخ کی نه نکبت لر قاباغا گلیب ، پیامبرلرین هامیسی نین اهل بیتی کی آللهین محضرینده اونا منزلت وار ، مخصوص احترامی وار کی اونا گوره او بیری اقربایه ترجیح وئردیلر مگر سنین اهل بیتی وی یا رسول الله ! اوندا کی سن ئولدون و توپراقلار بیزی نن سیزین آراز دا حائل اولدی جماعت اوره کلرینده اولان (جیجیک و کینه لری ) آشکار ائتدیلر.بیر گروه بیزی نن قاش قاباق ائدیب بیزی یونگول سایدیلار و الیمیزده اولان یئری غصبی نن الیمیزده ن چیخارتدیلار .سیز بیر نورودوز کی اونون ائشیقلیقیندان استفاده اولاردی .عزیز پروردگارین طرفیندن سیزه کتابلار نازل اولار دی .جبرئیل گئتیردیقی آیه لری نن بیزه انس و الفت سببی ایدی .ایندیکی سیزی الده ن وئرمیشیق هر خیرین یولی بیزه باغلانیب .ایکاش سیزده ن قاباق ئولوم بیزی آپاره ایدی .اوندا کی سیز بو دنیانی ترک ائتدیز و قوملار(شن ها ) بیزی نن سیزین آراز دا حائل اولدی بیزه ائله مصیبت و غم یئتیشدی کی جماعتین هئش بیرینه اولار یئتیشمه میشدی .
فاطمه و علی
سورا حضرت صدیقه طاهره (صلوات الله علیها) قییدی .و مولا اونون مراجعتی و مبارک سیماسی نین پارلاماسینا منتظری دی .وقتی ائوه یئتیشدی مولایه بویوردی : ای ابی طالبین اوغلی .آیا بیر اوشاق کیمی کی جنین ده دی ئوزووه پرده چکمیسئن؟ و ائوده ایلئشمیسن او کئسه تای کی اونا تهمت وورلوب ؟شاهین لرین ، شاه قاناتلارین سیندیرار دین ، آمما ایندی ضعیف قوشلارین قول قاناتلاریندان قالمیسان ؟ ایندی ابو قحافه اوغلی ، آتامین عطیه سی و اوشاقلاریمین معیشتین ظلمی نن من نن اوغورلور، آشکارا من نن دشمن لیق ائدیر و منیم سوزومه شد تی نن حمله ائدیر و جسارتی نن مجادله الیر .ایشیم اورا چاتیب کی انصار منیم کمک لیقیم نان ال چکیر و او بیری مهاجرلر دوست لوق ارتباطلارین کئسیبلر.بیر عده ده کمک ائتماقدان گوز اورتوبلر.ایندی نه مدافعیم وار نه اولارین قاباغین آلان .اوره ک دولوسی خشم و غضبی نن اوردان چیخمیشام و نهایت خوارلیق و خفتی نن قییدمیشئم.بلی او گون شکست یئدین کی ئوز تند اولماغیوی ضایع ائتدین .بیر گون واردی کی قوردلاری شکار ائدیب ییرتاردین، آمما ایندی توپراقدا اوتورماغی اختیار ائدیبسن؟ دانیشانین جوابین وئرمیسن و باطلی یول اوستونن گوتورموسن .من داهی چاره نی الده ن وئرمیشئم .ایکاش بو خوارلیق و ذلت ده ن قاباق ئولی ایدیم .(اوره گیم داریخیر، سیزده ن سوای اوره ک سوزلریمی کیمین یانیندا آچیم ؟) بو سوزلرده کی سیزی نن دانیشدیم و صادراولان کم حرمت لیق دا عذر ایستیئنیم آلله دی ایستئر منی بوشلیه سن و یا حمایت بویوراسان ، وای منه هر بیر گون چیخان وقت ده ، دایاقیم و اعتماد یئریم ئولدی ، قول لاریم سست لاشدی ، آتامین محضرینه شکایت آپاریرام و پروردگاریم نان ایستیرم منیم دادیما چاتسین .پروردگارا ، سنین قدرت و نیرون هامیدان چوخ و عذاب و کیفرین هامیدان شدتلی دی .
بو حالدا مولای متقیان بویوردی : هئش وقت سنه چتین لیق و ناگوارلیق دئیر بلکه ناگوارلیقلار هامیسی سیزین دشمنیزین کی دی.غم و غصه زی خاموش ائدین ای عالمیانین سئچیلمیشی نین قیزی و آخرالزمان پیامبرین یادگاری .من کی دینیم ده هئش وقت سست لوق ائتمه میشم و قدرتیم ده اولان قدر، اوزاق لاشمامیشام .اگر سیزین نظریز روزی دان کفاف قدری دی ، اونی آلله ضمانت ائدیب و آلله محکم بیر ضامن دی .و او کی آخرت ده سیزه مهیا و آماده اولوب ، سیزین الیزده ن آلانلاردان برتر و والا دی .بونا گوره بو مسئله نی آللها واگذار ائدین .
صدیقه طاهره بویوردی : حسبی الله (آلله منی کفایت ائلر) . و داها دانیشمادی.
