آرمان مهدویت مذهبی ، اعتقادی
هیچ قلبده قلبیمده اولان غلغله یوخدی
بیر چاره من زار و پریشان دیله یوخدی
روحیم ائله جسمیمدن ائدوب ترک علاقه
گویا که داخی میلی بو آب و گله یوخدی
دوتقون گویولی گلشن آچار گوللر آچاندا
بولمم ندی گلزاریده مئیلیم گوله یوخدی
یاریم ائله کاشانه ده منزل ائلیوبدی
هیچ فکرو خیالین یولی اول منزله یوخدی
بیر یوسف گم گشته نین آواره سیم من
کاشانه صبریم تالانوب حوصله یوخدی
بیر دامه سالوب سلسله زلف کمالی
عالمده ائله دامه سالان سلسله یوخدی
بیر یار سفر کرده گرفتاریم آخر
دردیم اودی اوندان صورا بیر مسئله یوخدی
آخر نه قدر من سوروشوم قافله لردن
آیا نه خبر واردی دئسونلر هله یوخدی
بیر عمردی حسرت گوزومی یوللاراتیکدیم
هر قافله گیچدی او اولان قافله یوخدی
عاشق اولاسان یاره الون چاتمیا هرگز
عاشق لره بونداندا چتین مرحله یوخدی
اما بو گلایه اوزوموزدن گرگ اولسون
یوخسا او گوزل صاحبیمیزدن گله یوخدی
یاریله عمللر آرادا فاصله سالمیش
یوخسا آرامیزدا ائله بیر فاصله یوخدی
نیلوم عملیم اولماسادا عاشقی یم من
بو عشقده آرامیشیم افکاریله یوخدی
عالمده گنهکار مگر عاشق اولانماز
بو باره ده که جای مذمت دیله یوخدی
بیز هیچ، آناون خاطرینه گل بیزه باش چک
زهرا آدی گلسه داخی بیر مسئله یوخدی
گل سود امرین قانینی آل خسته ربابین
قلبینده توانی بو قدر نسگیله یوخدی
((زرین قلم)) عاجز دی گوزل یازماقا امّا
بو مسئله لر عابدیله خوندله یوخدی
شاعر : حاج حمید زرین قلم تبریزی
